Cantiga da romaxe da Santa María de Rábade
Eu soñei en Rábade, á beira do Miño,
os teus ollos tenros como un aloumiño.
O corazón a tremar.
Eu soñei en Rábade, pola festa maior,
os teus ollos fondos acesos de amor.
O corazón a tremar.
Eu soñei en Rábade, pola Santa María
e o meu soño, amiga, en ti se cumpría.
O corazón a tremar.
Eu en Rábade, amiga, por soñar, soñei
o teu corpo belido, ó que eu namorei.
O corazón a tremar.
Eu soñei en Rábade a túa alma de estrela
e, polo meu soño, quedei preso nela.
O corazón a tremar.
Terra Chá (1954)
Ningún comentario:
Publicar un comentario