Novas lúas de outono

A 10ª edición das Lúas de Outono puxo na voz de Susana Seivane un par de textos da Escolma de poetas de Outeiro de Rei, un deles é este que Manuel María atribúe á voz de Gabriela Maira Roibás:

- O soño meu no Outono

cecais se me durmirá.

Dime ti, meu doce dono,

se o meu soño soñará.

- O meu soño soñador,

dime, ¿qué soño soñou?

- Soñou un soño de amor.

Soñou que te namorou.

- Tiven un soño, amigo.

Un soño de namorar.

¡E como soñei contigo

nunca quixera espertar!

Escolma de poetas de Outeiro de Rei (1982)