xoves, 7 de xaneiro de 2016

Raigañas en terra montañesa

A miña avoa Consuelo, A Quiroguesa,
era leda, risoña e faladora:
a súa musical verba cantadora
no meu corazón vai, fidel e acesa.

Era verba que non se leva agora,
cunha raíz anterga e montañesa,
un murmurio de vento na devesa,
claridades de río e luz de aurora.

E sentín florecer como a cerdeira
unha forte, escurísima inquedanza,
cunha paixón profunda e verdadeira.

É que levaba a Quiroga na lembranza
como se leva un destino, unha bandeira,
un ensoño que se ama e non se alcanza.

Sonetos ao Val de Quiroga (1988)

Ningún comentario:

Publicar un comentario